Eronning Fors viloyati O'zbekiston hududlari bilan turizm sohasidagi hamkorlikni rivojlantiradi

O'zbekiston elchisi Fariddin Nasriyev Eronning Fors viloyatiga tashrifi davomida viloyat gubernatori Husseyn Ali Amiriy bilan uchrashuv o'tkazdi.

Muloqot avvalida O'zbekiston bilan Eron o'rtasidagi hamkorlik ikki mamlakat rahbarlarining ishonchi va siyosiy irodasi tufayli mustahkamlanib borayotgani qayd etildi.

Husseyn Ali Amiriy hududlararo aloqalarni rivojlantirish ikki mamlakat savdo-iqtisodiy aloqalari uchun muhim o'rin egallashini ta'kidladi. "Fors viloyati Eronda kattaligi va 6 millionlik aholisi hamda rivojlangan iqtisodiyoti bilan uchinchi o'rinda turadi. Shuningdek, viloyatimizda Taxt-ye-Jamshid, Naqsh-ye-Rustam, Hofiz Sheroziy va Sa'diy Sheroziy kabi allomalarning tarixiy majmualari joylashgani ham turizm sohasida hamkorlikni rivojlantirish uchun muhim ahamiyat kasb etishi mumkin", dedi u.

Uchrashuvda ikki tomonlama hamkorlik istiqbollarini muhokama qilish maqsadida o'zaro tashriflarni tashkil etish taklifi qo'llab-quvvatlandi.